Stuhia e borës paralizonë jetën në Stamboll dhe Athinë

Kryetari i bashkisë së Stambollit Ekrem Imamoglu raportoi se 85 centimetra borë ishin matur në disa pjesë të qytetit dhe se shumë rrugë në qytet ishin të mbyllura, njoftoi Anatolia.

Reshje të dendura bore, të paralajmëruara nga meteorologët ditët e fundit, kanë goditur Stambollin, veçanërisht pjesët perëndimore të qytetit më të populluar të Turqisë.

Aeroporti i Stambollit është mbyllur për fluturime për shkak të reshjeve të mëdha të borës.

Kryebashkiaku Imamoglu monitoroi aktivitetet e Qendrës për Koordinimin e Fatkeqësive (AKOM) dhe i përshkroi reshjet e borës që goditën Stambollin si “katastrofike”.

 

Në disa pjesë të Stambollit, lartësia e borës ka arritur deri në një metër.

“Në disa pjesë të Arnavutkoy, Basaksehir dhe Sultangazi, lartësia e borës është matur në 80-85 centimetra. Në jug bie në 50-60 centimetra”, tha Imamoglu.

Duke thënë se po punojnë në koordinim me Zyrën e Guvernatorit dhe AFAD-in, Imamoglu tha se “shumë rrugë janë të mbyllura. Ka rrugë ku qarkullimi është i vështirë, por edhe rrugë me qarkullim të pezulluar tërësisht. Po bëjmë përpjekje intensive çdo minutë për të qenë pranë qytetarëve tanë që janë në një situatë shumë të vështirë”.

Edhe Athina nën borë

Mbulesa e borës ka mbuluar të gjithë kryeqytetin grek mbrëmjen e djeshme, duke ndërprerë trafikun ajror dhe duke bllokuar dhjetëra drejtues mjetesh në autostradë.

Situata më dramatike është në autostradën Attica Odos, një bypass rreth Athinës që lidh kryeqytetin me aeroportin, ku aktualisht janë ende të bllokuara qindra automjete, raporton portali grek Kathimerini.

Ekipet e shpëtimit luftuan gjatë gjithë natës për të liruar qindra shoferë ndërsa një stuhi e quajtur “Elpida” goditi Greqinë dhe mbuloi Athinën me një shtresë të trashë dëbore, raporton Reuters.

Njësitet e shpëtimit tokësor me makineri të rënda dhe autoambulanca po marrin pjesë në operacionin e shpëtimit.

Ministri grek për Krizat Klimatike dhe Mbrojtjen Civile, Christos Stylianides fajësoi kompaninë përgjegjëse të rrugës për situatën në bypass, duke deklaruar se drejtuesit e saj siguruan në disa takime me përfaqësuesit e qeverisë se do të kishin pajisje të mjaftueshme për ta mbajtur rrugën të hapur për qarkullimin.

“Mendoj se duhet të vendosim përgjegjësi. Këtë do t’ia propozoj kryeministrit”, tha ministri.

Mediat greke treguan pamjet e ushtarëve që ndanin ushqim, ujë dhe batanije për disa nga shoferët ndërsa temperatura ra gjatë natës.

Reshjet e dendura të borës janë të rralla në Athinë, por qyteti është goditur nga stuhi dëbore për të dytin vit radhazi.