Sulmi në ishullin Diego Garcia, IDF: Raketat iraniane kanë rrezen e duhur për të goditur Romën, Parisin dhe Berlinin

Shefi i Shtabit të Forcave të Mbrojtjes së Izraelit (IDF), gjenerallejtënant Eyal Zamir, tha se raketat iraniane kanë një “rreze veprimi që mund të arrijnë kryeqytetet evropiane: Berlinin, Parisin dhe Romën”.

Kjo deklaratë e tyre vjen pasi më herët Presidenti amerikan Donald Trump deklaroi se SHBA-të dhe Izraeli janë duke i arritur objektivat e tyre me operacionin në Iran.

Po ashtu, vendet e G7 u bashkuan sot kundër Iranit, ku ministrat e jashtëm të tyre i bënë thirrje Teheranit që të ndalë sulmet në rajon dhe të garantojë sigurinë në Ngushticën e Hormuzit.

Nga ana tjetër, gjatë orëve të fundit, Irani ka nisur një valë raketash drejt qytetit jugor Izraelit të Dimonës, ku zhvillohet programi bërthamor i Tel Avivit. Nga sulmet u plagosën të paktën 39 persona, por nuk ka të dhëna për incident bërthamor. Sulmi vjen si shenjë hakmarrje pasi forcat izraelite dhe amerikane kryen sulme në impiantin bërthamor iranian në Natanz.

Më herët gjatë natës së kaluar, Irani kreu një valë të re sulmesh ndaj Izraelit, Arabisë Saudite, Emirateve të Bashkuara Arabe dhe Kuvajtit në ditën e 22-të të luftës. Ndër të tjera ai ka kërcënuar Emiratet e Bashkuara Arabe se do të sulmojë qytetin portual Ras al-Khaimah nëse ishujt e saj të Gjirit vazhdojnë të sulmohen.

Irani ka konfirmuar se ka lëshuar dy raketa balistike drejt bazës anglo-amerikane në Diego Garcia, e vendosur në zemër të Oqeanit Indian. Ushtria izraelite tha në orët e para të së shtunës se një valë e re raketash ishte lëshuar nga Irani drejt territorit të saj, duke shtuar se mbrojtja ajrore ishte aktivizuar për të kapur predhat. Nga ana tjetër, ushtria izraelite tha se goditi objektivat e Hezbollahut në Bejrut, pasi lëshoi një paralajmërim evakuimi për shtatë lagje në periferitë jugore të kryeqytetit libanez.

Teksa luftimet vijojnë, SHBA-të kanë hequr dorë përkohësisht nga sanksionet mbi naftën iraniane që ndodhet aktualisht në det të hapur, duke lejuar që ajo të shitet në shumicën e vendeve me qëllim mbajtjen e çmimeve të naftës të ulëta. Autorizimi afatshkurtër do të lejojë që afërsisht 140 milionë fuçi naftë të hyjnë në tregjet globale.

Ndërkohë Administrata e Donald Trump po harton një strategji për të siguruar ose nxjerrë materialet bërthamore të Iranit, thanë burime për CBS News. Sipas tyre planifikimi është përqendruar në vendosjen e mundshme të forcave nga Komanda e Përbashkët e Operacioneve Speciale, një njësi ushtarake elitare që shpesh ngarkohet me operacione shumë të ndjeshme.