“Ti prej Prishtine po do me ruajt tokën tem”, protestuesit të tensionuar kapen me Fitore Pacollin

Banorë të Rugovës dhe përfaqësues të bizneseve lokale protestuan të premten para Ministrisë së Mjedisit dhe Planifikimit Hapësinor, duke kundërshtuar vendimin për pezullimin e mallrave dhe shërbimeve ndërtimore në këtë zonë.

Protestuesit kërkuan anulimin e menjëhershëm të vendimit, duke thënë se ai po dëmton ekonominë lokale dhe jetën e banorëve të Rugovës. Gjatë protestës pati tensione verbale mes qytetarëve dhe ministres në detyrë të Mjedisit, Fitore Pacolli, e cila doli për të biseduar me ta.

Njëri nga protestuesit iu drejtua ashpër ministres duke thënë se askush nuk mund ta mbrojë tokën e Rugovës më shumë sesa vetë banorët e saj.

Përfaqësuesit e protestuesve deklaruan se janë të gatshëm për dialog me institucionet, por vetëm pasi të tërhiqet vendimi për pezullimin e aktiviteteve ndërtimore.

Protesta u organizua nën moton: “Rugova nuk hesht – Rugova kërkon drejtësi!”.