Tjetër përplasje me Rusinë, ambasadori shqiptar në OKB: Laboratorët e armëve biologjike në Ukrainë, trillime të Moskës

Ambasadori shqiptar në OKB i ka quajtur trillime, pretendimet e Rusisë se ka zbuluar laboratorë të armëve biologjike në Ukrainë. Madje Hoxha ka shkuar edhe më tej duke ngritur alarmin se Rusia përmes këtyre akuzave po përgatit terrenin për të përdorur armët e shkatërrimit masiv.

Këshilli i Sigurimit të OKB-së është mbledhur me kërkesë të Rusisë, e cila pretendon për zbulimin e laboratorëve të armëve biologjike në Ukrainë.

Sipas Moskës Zyrtare këto laboratore janë financuar nga Shtetet e Bashkuara të Amerikës.

Ministria e Mbrojtjes ruse ka publikuar disa dokumente në të cilat thuhej se në Kiev, Karkov dhe Odesa po studiohej mundësia e përhapjes së infeksioneve të rrezikshme përmes shpendëve migrues.

Si Uashingtoni ashtu edhe Kievi i kanë mohuar akuzat, me Shtetet e Bashkuara që thonë se ato janë një shenjë se Moska së shpejti mund të përdorë vetë armët.

Një ndër zërat kritikë ndaj këtyre pretendimeve në mbledhjen e Këshillit të Sigurimit ishte edhe ai i ambasadorit të Shqipërisë në OKB, Ferit Hoxha, i cili akuzoi Moskën për përhapjen e lajmeve të rreme, duke theksuar edhe njëherë se Rusia po përgatit terrenin për të përdorur vetë armët biologjike.

“Këshillit nuk duhet t’i rrëfehen trillime apo histori shtangëse. Duhen prova të verifikuara në mënyrë të pavarur dhe të konfirmuara. Ky nuk është rasti. Ne duhet të jemi të shqetësuar për këtë dizinformim, për shtimin e akuzave për armë të shkatërrimit në masë, një mënyrë që Rusia e përdor për të përgatitur terrenin për përdorimin e armëve kimike e biologjie gjatë sulmit që po kryen në Ukrainë, por për të akuzuar të tjerët se po e bëjnë këtë”, u shpreh ai.

Në të njëjtën linjë ishte edhe Britania e Madhe si edhe përfaqësuesi i lartë i Kombeve të Bashkuara për çështjet e çarmatimit.