U detyrua të kthehej në punë pasi humbi fondin e pensionit, veterani 88-vjeçar mallëngjehet pasi merr çekun e majmë me kontribute nga e gjithë bota

Një veteran lufte 88-vjeçar, i cili u detyrua të rikthehej në punë me kohë të plotë pasi humbi pensionin, është prekur thellë kur mori një çek prej 1,77 milionë dollarësh, dhuruar nga njerëz të panjohur dhe zemërgjerë nga e gjithë bota.

Ed Bambas, nga Brighton, Michigan, shërbeu në ushtrinë amerikane dhe më pas punoi për vite të tëra në kompaninë General Motors, duke pritur që pensioni t’i siguronte një jetë të qetë pas daljes në pension në vitin 1999, shkruan A2 CNN. Por gjithçka ndryshoi në vitin 2009 kur GM u përball me falimentimin. Si pasojë, rreth 20 000 punonjës të Delphi Corporation, një filial i GM, humbën fondin e sigurimeve dhe Bambas mbeti pa të ardhurat e tij të pleqërisë.

Situata u rëndua edhe më shumë kur bashkëshortja e tij, Joan, u sëmur rëndë. Pa sigurim shëndetësor, Bambas u detyrua të shiste shtëpinë për të përballuar shpenzimet mjekësore. Ajo ndërroi jetë në vitin 2018, duke e lënë atë të thyer emocionalisht dhe në vështirësi financiare. I vetmuar dhe në nevojë, veterani u rikthye në punë me kohë të plotë për të mbijetuar.

Historia e Bambas preku zemrat e miliona njerëzve, mes tyre edhe influencuesin australian Sam Weidenhofer, i cili kur e dëgjoi rrëfimin e tij vendosi të ndërmarrë veprim. Weidenhofer e takoi 88-vjeçarin në vendin e punës, e dëgjoi të tregonte jetën e tij dhe më pas i dhuroi 400 dollarë në vend. Ai hapi edhe një GoFundMe, duke u bërë thirrje njerëzve të ndihmonin veteranin që të mund të tërhiqej më në fund nga puna dhe të jetonte me dinjitet.

Më 6 dhjetor, në një ceremoni emocionuese të mbajtur në Foguth Financial Group në Brighton, Michigan, Weidenhofer i dorëzoi Bambas një çek gjigant me shumën e mbledhur: plot 1 770 000 dollarë.

“Me mbështetjen e të gjithëve në këtë sallë dhe mijëra njerëzve online, kemi arritur një nga fondet individuale më të mëdha në historinë e GoFundMe”, tha Weidenhofer, ndërsa veterani shpërtheu në lot. “Ishte sikur një ëndërr… faleminderit”, arriti të thoshte Bambas duke u përqafuar me influencuesin.