Dhuna në familje vazhdon të mbetet një nga damkat më të mëdha të shoqërisë kosovare. Çdo ditë në Polici raportohen raste të grave që përjetojnë dhunë në forma të ndryshme nga personat të cilët i kanë zgjedhur të ndajnë jetën me ta, por edhe nga anëtarët tjerë të familjes.
Një ndër këto raste kishte ndodhur në muajin dhjetor, të vitit të kaluar, ku ishte përfshirë një mërgimtar nga Zvicra, i cili ishte denoncuar për dhunë nga bashkëshortja.
I dyshuari, i cili është nga komuna e Gjilanit, ishte shpallur në kërkim policor dhe ndaj tij ishte lëshuar urdhër për arrestim dhe ndalim, pasi ishte larguar nga Kosova posa kishte ndodhur rasti dhe kishte marrë rrugën për në Zvicër.
Disa muaj pas denoncimit, ai vendosi të vijë në Kosovë, me ç’rast u arrestua në Aeroportin Ndërkombëtar të Prishtinës, pasi rezultoi se është në listën e personave të kërkuar.
Pasi iu vunë prangat, i dyshuari u shoqërua në stacion policor për intervistim, ku pas përfundimit të procedurave policore, ndaj tij është nxjerrë aktvendim për ndalim prej 48 orësh.
Ndryshe, viktima 40-vjeçarja e kishte raportuar të dyshuarin në fillim të muajit dhjetor, ku kishte kërkuar ndihmën e Policisë, për shkak të frikës që ia kishte shkaktuar.
