Vizita e kryeministrit australian në xhami del jashtë parashikimit, pritet me fishkëllima e sharje

Kryeministri australian u përball me fishkëllima dhe kundërshtime nga protestues gjatë një vizite në xhaminë më të madhe të vendit.

Anthony Albanese dhe Ministri i Punëve të Brendshme i Australisë, Tony Burke, iu bashkuan besimtarëve në xhaminë Lakemba në Sidnei për faljet e Bajramit të premten.

Video nga ngjarja tregoi disa protestues që ndërprenë lutjen duke u thënë atyre “largohuni!” dhe duke i quajtur “mbështetës të gjenocidit” apo “qen të qelbur”.

Një roje sigurie u pa duke hedhur në tokë një nga personat që po bërtiste, përpara se ta shoqëronte jashtë.

Në një moment gjatë tensioneve, një organizator i kërkoi turmës të ulej dhe të ndalonte filmimin, duke thënë: “Të dashur vëllezër dhe motra, qëndroni pak të qetë” dhe “është Bajram. Është një ditë gëzimi”.

Por situata nuk u mbyll me aq pasi disa persona vijonin të bërtisnin “turp për ju” ndërsa politikanët largoheshin.

Disa anëtarë të komuniteteve myslimane dhe hebraike në Australi janë të zemëruar për qëndrimin e qeverisë ndaj sulmit të Izraelit në Gaza.

Kryeministri e përshkroi ngjarjen si “jashtëzakonisht pozitive”, duke shtuar se “nëse ke disa persona që bërtasin në një turmë prej 30,000 vetash, kjo duhet parë në kontekst”.

Ai tha se disa ishin të acaruar nga vendimi i qeverisë së tij, i njoftuar më herët këtë muaj, për ta shpallur organizatën islamiste Hizb ut-Tahrir si një grup të ndaluar urrejtjeje sipas ligjeve të vendosura pas të shtënave masive të dhjetorit në Bondi Beach të Sidneit.