Vrasja e Liridona Ademajt, publikohen për herë të parë në seancën e sotme pamje nga nata fatale

Në Gjykatën Themelore në Prishtinë po zhvillohet seanca ndaj 4 të akuzuarve për vrasjen e Liridona Ademajt; Naim Murseli, Granit Plavës, Kushtrim Kokallës dhe Tom Dodajt. A2 CNN mëson se gjatë seancës, ku janë të pranishëm janë edhe familjarët e Liridonës, u prezantuan edhe disa pamje të reja nga nata fatale, kur u vra 30-vjeçarja.

Në aktakuzën e Prokurorisë, thuhet se Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’i paguante atij 30 mijë euro.

Plani për vrasjen e Liridonës, thuhet se u bë nga bashkëshorti i saj, i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.

Në aktakuzë thuhet se fillimisht plani i ishte shpalosur Kokallës nga Murseli, por ai kishte refuzuar të gjente një mundësi për vrasjen e Liridonës, e më pas Kokalla kishte gjetur Plavën, me të cilin e kishte njoftuar Naimin.

Naim Murseli, thuhet se siguroi armën me 20 fishekë, nga i akuzuari Tom Dodaj, nga i cili e bleu për 280 euro. Me këtë armë, u krye vrasja e Liridonës.

Të mërkurën (15 janar 2025) Prokuroria Themelore në Prishtinë ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt, të cilët ngarkohen për rastin e vrasjes së Liridona Ademajt më 29 nëntor 2023.

Seanca duhej të mbahej më 27 janar, por u ndërpre pak minuta pasi nisi, për shkak se avokatët e dy të akuzuarve thanë se nuk kishin pranuar me kohë shkresat e lëndës.

Ata thanë se duke mos pasur shkresat e nevojshme, nuk mund të këshillojnë klientët e tyre si të deklarohen për aktakuzën.

Gjyqtarja u kërkoi që në seancën e 31 janarit, ekipet mbrojtëse të jenë të përgatitura.