Abdixhiku thumbon Shpend Ahmetin: Përparim Rama s’merret me politikë e as dialog, merret me kryeqytet

Kryetari i LDK-së, Lumir Abdixhiku ka thënë se kandidati i kësaj partie për kryetar të Prishtinës, Përparim Rama, do të merret me kryeqytetin dhe jo me politikë dhe çështjen e dialogut.

“Përparim Ramën nuk e kemi sjell me u marr me dialog. Ai nuk merret me politikë, merret me kryeqytet. Nuk keni për ta dëgjuar duke folur për dialog, liberalizim, por si me rregullu Prishtinën. Prishtinës i duhet një menaxher, andaj kjo është zgjedhja më e mire. Deri ma tani kandidaturat për Prishtinën i kemi parë si promovim, asnjëherë për qytetarët. E gjithë LDK-ja është prapa Përparimit, do t’u shërbejë qytetarëve të Prishtinës. Përparim Rama në botë është i njohur për gjelbërim, i njohur për sjellje të gjelbërim. Ai do t’i shërbejë ligjit asnjëherë nuk ka shkel ligj”, ka thënë Abdixhiku.

Këto komente Abdixhiku i bëri në debatin “Fol hapur”, nga ku kritikoi edhe qeverinë e Kurtit duke theksuar se i gjithë kabineti qeveritar është i dobët dhe se është një qeveri e praktikantëve.

Kujtojmë se kryetari aktual i kryeqytetit, Shpend Ahmeti, shpesh është kritikuar për përfshirjen e tij në nivelin qëndror.

Ai madje gjatë kohës sa ishte kryetar i Prishtinës, mori përsipër edhe detyrën e udhëheqësit të ekipit negociator për procesin e dialogut për normalizimin e marrëdhënieve me Serbinë gjatë Qeverisë Haradinaj në vitin 2018.