“Ditë e errët” për një nga gazetat më të vjetra në botë

Të enjten, më 27 prill, parlamenti austriak vendosi t’i japë fund shtypjes së Wiener Zeitung, një prej gazetave ditore më të vjetra në botë, e cila tashmë do të lexohet vetëm në formë dixhitale.

Kjo gazetë e përditshme 320-vjeçare tani e tutje do të botohet vetëm një herë në muaj, vendosi koalicioni konservator-gjelbër, pavarësisht kritikave të ashpra nga artistët dhe partitë opozitare.

Gazeta u themelua në vitin 1703, atëherë me emrin Wienerisches Diarium (Ditari i Vjenës) dhe ishte gazeta zyrtare e monarkisë së Habsburgëve.

Në vitin 2021, koalicioni qeverisës vendosi që gazeta, në pronësi të qeverisë austriake, të ndalonte publikimin e reklamave të kompanive, e cila ishte burimi kryesor i financimit të saj.

“Gazeta ka më shumë lexues mbi 90 sesa nën 30,” tha Ministrja e Familjes dhe Medias Susanne Raab e Partisë Konservatore Popullore Austriake (ÖVP).

Shkrimtarja austriak dhe fituesja e çmimit Nobel, Elfriede Jelinek dhe artisti André Heller janë disa nga njerëzit e shquar që u përpoqën të ruanin botimin e shtypur. Përfaqësuesit e opozitës e kritikuan vendimin sepse mendojnë se varfëron hapësirën mediatike.

“Është një goditje për politikën dhe kulturën mediatike,” tha nënkryetari i Partisë Social Demokrate (SPÖ), Jörg Leichtfried.