Kolegji i Gjykatës Supreme të Kosovës, ka publikuar arsyetimin për lirimi e Naser Pajazitajt nga akuza për vrasjen e Donjeta Pajazitajt.
Trupi gjykues i udhëhequr nga gjyqtarja, Valdete Daka, ka konstatuar se në këtë rast nuk ka prova të drejtpërdrejta të cilat e ngarkojnë të dënuarin, për kryerjen e veprës penale “Vrasje e rëndë”, duke shtuar se rrethanat subjektive në këtë rast janë kontestuese. Përkatësisht fakti se a është i pandehuri, kryesi i veprës penale.
“Është pikërisht ky aspekt, që bëri dallimin mes interpretimit të bërë nga gjykata e shkallës së parë dhe të cilin konstatim e kishte pranuar edhe gjykata e shkallës së dytë në njërën anë dhe Gjykatës Supreme të Kosovës në anën tjetër”, shkruan në arsyetimin e Gjykatës Supreme.
“Gjykata Supreme ka konstatuar se në këtë çështje juridiko penale, nuk ka prova të drejtpërdrejta që argumentojnë fajësinë e Naser Pajazitajt, të dënuar për vrasjen e Donjetës, “por vetëm indicie dhe se skema e ngjarjes është ndërtuar duke u bazuar në prova rrethanore, duke u ndërlidhur hallkat e zinxhirit të ngjarjes”.
“Për këtë arsye, për gjykimin e një rasti bazuar në prova rrethanore, gjithmonë është i nevojshëm standardi i vërtetuar përtej dyshimit të arsyeshëm dhe i cili përmbushet vetëm atëherë kur përfundimi i nxjerrë nga këto prova është i vetmi përfundim i arsyeshëm që mund të nxjerrët prej provave të paraqitura”.
“Pra, duhet të sigurohen prova që të mbyllet qarku, përkatësisht të përjashtohet mundësia që personat e tjerë të jenë kryes të veprës penale. E në rastin konkret, ky qark nuk është mbyllur”, thotë Gjykata Supreme.
Gjykata Supreme e Kosovës shpreh shqetësimin e saj për standardin e aplikuar së pari nga ana e Prokurorisë së Shtetit e mbështetur pastaj nga ana e dy gjykatave të dy instancave më të ulëta gjyqësore, të cilat përdorën një standard minimal të të provuarit dhe kundër kësaj “shqiptuan dënim maksimal dhe atë pa një vlerësim dhe analizë të mirëfilltë dhe gjithëpërfshirëse të provave që ishin në shkresat e lëndës dhe njëkohësisht duke bërë interpretim të gabuar të ligjit penal”.
Por, Gjykata Supreme e gjen fajtor Naser Pajazitajn për dy veprat tjera penale me të cilat ngarkohej njëkohësisht me atë të vrasjes së rëndë.
“Sa iu përket dy veprave penale të mbajtjes në pronësi, kontroll apo posedim të paautorizuar të armëve, dënimet e shqiptuara në kohëzgjatje prej 1 (një) viti dhe në kohëzgjatje prej 5 (pesë) muaj, janë marr si të vërtetuara dhe dënimi unik është caktuar burgimi në kohëzgjatje prej 1 (një) viti e 3 (tre) muaj (dënim të cilin N.P., e ka kaluar në burg)”, thuhet në dokumentin e publikuar nga Gjykata Supreme, si arsyetim për vendimin e marrë në këtë rast.
