Trump ndërpret përfundimisht marrëdhëniet e SHBA’së me OBSH’në
Presidenti i Shteteve të Bashkuara, Donald Trump, tha se Uashingtoni i ka përfunduar marrëdhëniet e tij me Organizatën Botërore të Shëndetësisë.
Trump tha se OBSH-ja, agjenci e Kombeve të Bashkuara, ka dështuar t’i bëjë reformat “e kërkuara dhe shumë të nevojshme”, pas shqetësimeve të SHBA-së për mënyrën se si e ka trajtuar pandeminë e koronavirusit.
Në muajin prill, Trump i ka ndërprerë fondet për OBSH-në, duke e akuzuar atë për fshehje të përhapjes së koronavirusit, pasi është shfaqur në Kinë, në muajin dhjetor.
Trump tha të premten se SHBA-ja “do t’i ndajë këto fonde për nevoja të tjera urgjente në botë”.
Ai tha se Kina ka kontroll të plotë mbi OBSH-në, edhe pse ajo paguan vetëm një pjesë të fondeve që ka dhënë SHBA-ja deri më tash.
Udhëheqësi i OBSH-së, Tedros Adhanom Ghebreyesus, ka thënë se agjencia e tij nuk ka fshehur informacione për koronavirusin për asnjë vend.
Ai ka thënë se OBSH-ja “e ka lëshuar herët alarmin” për koronavirus, porse trajtimi i pandemisë do të hetohet në mënyrë të pavarur.
