Trump sulmon Papa Leone XIV: I dobët e i tmerrshëm! Replikon Ati i Shenjtë: S’kam frikë, do të vazhdoj të kundërshtoj luftën

Presidenti i Shteteve të Bashkuara Donald Trump ka përdorur fjalë të ashpra ndaj Papa Leone XIV mbrëmjen e djeshme në një sulm të pazakontë dhe të drejtpërdrejtë ndaj liderit të Kishës Katolike, që ka shkaktuar reagime të menjëhershme nga besimtarët dhe institucionet kishtare.

Në atë që për shumëkënd u pa si një përgjigje ndaj kritikave në rritje të Papës për konfliktin e nisur bashkërisht nga SHBA dhe Izraeli kundër Iran, si dhe ndaj politikave shumë të rrepta migratore të administratës së Trumpit, presidenti amerikan e quajti Leonin XIV “të tmerrshëm”.

Në mëngjes erdhi përgjigjja e vetë Papa Leones, i cili në një intervistë për Reuters tha se “nuk kam frikë nga Trump, do të vazhdoj të flas kundër luftës. Mesazhi i Ungjillit nuk duhet të keqpërdoret.” “Unë”, tha ai, “flas për Ungjillin. Nuk jam politikan. Nuk kam ndërmend të bëj debat me të,” theksoi ai. “Mesazhi është gjithmonë i njëjtë: paqja. Dhe ua them këtë të gjithë liderëve të botës. Le të përpiqemi ta përfundojmë këtë luftë.” “Nuk mendoj,” shtoi ai, “që mesazhi i Ungjillit duhet të keqpërdoret siç po bëjnë disa.”

Katolikët në rrjetet sociale reaguan duke kritikuar Trumpin për sulmin ndaj liderit të Kishës. Ndërkohë, kryeipeshkvi Paul S. Coakley, president i Konferencës së Ipeshkëve Katolikë të SHBA-së, u shpreh i trishtuar nga deklaratat e Trumpit. “Papa Leone nuk është rival i tij; as Papa nuk është politikan. Ai është përfaqësuesi i Krishtit që flet nga e vërteta e Ungjillit dhe për kujdesin e shpirtrave,” tha ai në një deklaratë zyrtare.

Robert Francis Prevost, me origjinë nga Çikago, është Papa i parë amerikan. Trump ka pretenduar se ai është zgjedhur pikërisht sepse është amerikan, madje edhe sepse në Shtëpinë e Bardhë është kthyer vetë ai: “Leone duhet të më jetë mirënjohës sepse, siç dihet, emërimi i tij ishte një surprizë e madhe. Nuk figuronte në asnjë listë kandidatësh dhe u zgjodh vetëm sepse është amerikan, sepse mendohej se kjo ishte mënyra më e mirë për të menaxhuar marrëdhënien me presidentin Donald J. Trump. Nëse unë nuk do të isha në Shtëpinë e Bardhë, Leone nuk do të ishte në Vatikan,” deklaroi ai.

I njohur për kujdesin në gjuhë, Papa në javët e fundit është bërë kritik i hapur i konfliktit në Iran dhe ka dënuar “çmendurinë e luftës” në një apel për paqe të shtunën. Vitin e kaluar ai kishte vënë në dyshim nëse politikat shumë të ashpra migratore të administratës Trump ishin në përputhje me mësimet e Kishës. “Kush thotë: ‘Jam kundër abortit, por jam dakord me trajtimin çnjerëzor të emigrantëve në SHBA’, nuk e di nëse është vërtet pro-jetës,” kishte thënë Papa në shtator.

Trump në postimin e tij të së dielës shkroi se “Leone duhet të marrë veten si Papë”, duke shtuar për gazetarët se nuk ishte “një fans i madh” i tij. Ai lavdëroi ndërkohë vëllain e Papës, të cilin e quajti një mbështetës të vërtetë të lëvizjes MAGA. Sulmi i Trumpit e akuzoi gjithashtu Leonen se ishte “i dobët në çështjen e armëve bërthamore”, pak ditë pasi Papa e kishte cilësuar “plotësisht të papranueshme” kërcënimin e presidentit amerikan për të shkatërruar qytetërimin iranian.

Në një fjalim për të Dielën e Palmave muajin e kaluar në Sheshin e Shën Pjetrit, Ati i Shenjtë kishte theksuar se Zoti i refuzon lutjet e liderëve që nisin luftëra dhe kanë duar “të lyera me gjak”, duke e quajtur konfliktin në Iran “të tmerrshëm”. Leone XIV gjithashtu i ka bërë thirrje Trumpit të gjejë një “rrugëdalje” për t’i dhënë fund konfliktit dhe për të “ulur nivelin e dhunës”.

Thirrja e tij për një qasje më humane ndaj emigracionit pasqyron qëndrime të shprehura edhe nga disa paraardhës të tij, por që bien ndesh me qëndrimin e Trumpit, i cili mbështet kufizimin e emigracionit nga vendet në zhvillim për të ulur kriminalitetin. “Ai është një person shumë liberal dhe nuk beson në ndalimin e krimit,” u tha Trump gazetarëve të dielën në mbrëmje. Ai ka pasur gjithashtu një marrëdhënie të tensionuar me paraardhësin e Leones, Papa Françeskun, i cili kishte kritikuar propozimet e tij për imigracionin gjatë fushatës së parë presidenciale dhe kishte thënë se Trump nuk ishte “i krishterë”. Trump e kishte quajtur Françeskun “turpërues” në fillim të vitit 2016.